AlmizanAlmizan logo
Jum'a 9 ga Shawwal, 1439 JBugu na 1346 ISSN 1595-4474

Rahotanni

Harbin da aka yi min a Abuja ya yaye bakin cikin da nake ciki -Shaikh Kasimu Umar Sakkwato


soji

Shaikh Kasimu Umar Sakkwato yana cikin ’yan uwan da jami’an tsaro suka harba a harin da suka kai wa masu Muzaharar lumana ta neman a saki Shaikh Ibraheem Zakzaky da ake tsare da shi ba bisa ka’ida ba da aka yi ranar Talata 16/01/2018. Wakilanmu Aliyu Saleh da Haruna Yakunu sun tattauna da shi a inda yake jinyar raunin da ya samu. Ya kuma fayyace masu zare da abawa a kan yadda harin ya faru da kuma halin da yake ciki yanzu, gami da alwashin da ya dauka na sake komawa Abuja don ci gaba da fafutikar da ake yi. ALMIZAN: Muna yi wa Malam sannu da jiki. Jama’a za su so su ji ya yanayin jikin naku yake yanzu?

SHAIKH KASIMU UMAR: Alhamdullahi, ina samun sauki gwargwardo. Domin bayan kwana biyu da aikin da aka yi min, ina dan rike karafa ina dogara su ina shiga makewayi in dawo. Ka ga wannan wata alama ce ta cin nasarar aikin da samun sauki.

ALMIZAN: Malam zai iya tuno abin da ya faru har ya zama ya samu wannan karaya da kuma rauni a jikinsa?

SHAIKH KASIMU UMAR: Hakikanin dai abin da ya faru shi ne; kamar yadda ’yan uwa suka sani akwai fita Muzahara da aka shirya ta kwana biyar a Abuja, wacce aka fara tun ranar Litinin zuwa Juma’a (15-19/2018). Ni kuma na fito Zariya ranar Lahadi da zimmar zan koma gida ranar Litinin. Daga bisani sai na ga ba zai yiwu in koma gida ba, kuma in dawo tunda ranar Litinin din za a fara Muzaharar, ka ga zan rasa Muzahara kusan biyu ke nan. Sai na aika a kawo min sauran tufafina. Daga nan na kama hanyar Abuja.

Lokacin da na isa Abuja mun tarar an yi Muzaharar farko a Federal Secretariat, wanda kuma sun sanya wa ’yan uwa tiyagas mai yawa, wannan ya jawo ’yan uwa sun galabaita sosai. Da yake a lokacin matasa ne suka taru suka shawarta a tsakaninsu, sai suka nanata cewa can kuma za a koma a sake yi gobe.

Da yake jami’an tsaro sun ji labari, sai suka rufe dukkan hanyoyin da za su kai mutane can wajen da aka shirya za a fara Muzaharar. Sai suka rika kama ’yan uwa maza da mata suna tafiya da su. Ko alamin addini suka gani a jikin mutum sai su kama shi. Mu kuma mun zo a daidai wannan lokacin. Sai muka ce bai kamata a sa ido ana ta kama ’yan uwa ba. Sai na ba da shawarar cewa a dakatar da ’yan uwa daga zuwa wajen, a canza wuri. Sai aka canza aka koma Wuse Market. Sai aka koma can. Muna ta tunanin wane lokaci ya kamata a sa masu. Cikin ikon Allah, ko da muka zo Wuse Market din sai muka ga kamar an yi ruwan ’yan uwa a wajen. An taru sosai. Kuma abin ban sha’awa mafiyansu matasa ne.

Gaskiya ni dai ban taba yin Muzahara a Abuja da ta faranta min rai, na ji dadinta kamar ta wannan ranar Talata din ba. Ana tafiya ana cewa Free Zakzaky! Free Zakzaky!! An kawo daidai wata mahada sai ga jami’an tsaro sun zo wajen. Suka tare suna ta antaya tiyagas. A daidai lokacin sai aka kora su bayan tiyagas dinsu ya kare. Ina ta kwakkwafa tunanin ’yan uwa don kar a taba masu kayansu da suka gudu suka bari. Don har wayoyi da motocinsu sun gudu sun bari. Ina ta jin tsoron kar a kona motocinsu a yi mana sharrin cewa ’yan uwa sun fara kona motocin jami’an tsaro.

Da yake matasan da ke gaba sun kora jami’an tsaron, sai ya zama yanzu mune a gaban Muzahrar ke nan. A daidai lokacin ne wasu mutane su uku, ba su sa ‘uniform’ na jami’an tsaro ba, da alama jami’an tsaron farin kaya ne. Na tsakiya sai ya duka ya daidaici zuciyata ya harba bindigar tasa, amma sai Allah ya sa ba ta kai can inda ya yi niyya ba, sai ta je ga katare (cinya). Harsashin ya shiga ya karya kashi har ya fita, har ya samu wani dan uwa, shi ma sai da ya samu rauni. A nan ne ’yan uwa suka kawo agajin gagaggawa.

Lokacin da na ji harbi, ban ji zafi ba, ban dauka ni aka harba ba. Sai da na dago kafa ta zan tsallaka wani rami sai na ji kamar an daure ta da buhunan simiti guda uku. Nan take ’yan uwa suka kawo agajin gaggawa, suka dauke ni daga wajen suka kai wani waje suka ajiye. Muna wajen sai ga jami’an tsaron sun dawo da gudu da motarsu suna ta dube-dube, suka koma suka sake bin Muzaharar ko za su ga an dauki wani da suka harba. Suka sake dawowa wajen da suka yi harbin suna bin jini don su ga inda aka yi da wanda suka harba. Muna ganin su suka gama dube-dubensu suka bar wajen, Allah bai sa sun gan mu ba. Daga nan aka zo da mota aka dauke ni daga wajen aka tafi da ni wajen da za a kula da lafiyata. A daidai wannan lokacin jini na ta zuba. Na dauki wayata da madubin idona na bai wa wani dan uwa, saboda na dauka tafiyar ce ta zo. Sai kuma ya zama ashe lokacin bai yi ba.

ALMIZAN: Da yake zuciya suka hara, kamar sun yi niyyar kisa ke nan? SHAIKH KASIMU UMAR: Kwarai da gaske kuwa. Ai ba tun yau ba, sun dade da wannan niyyar. Buratai da kansa ya je Sakkwato, ya je gidan Sarki da gidan Gwamna, ya bayyana masu cewa wai duk wani taro da ake yi a Kaduna, ko a Abuja, wai ana ganina gaba-gaba. Don haka ya ce masu ya kamata su dauki wani mataki a kaina ko da kuwa kisa ne. Amma an kyale ni ina kai-komo. Duk wani taro da za a yi ana gani na. Ka ga wannan dama wani abu ne da suka dade suna shiryawa. Kuma muna ta samun rahotanni na yunkurin kisan a lokuta daban-daban. To, da yake in an ce Malam Wane, sai wasu su dauka za a gan shi kato ne. Su ba su iya ganewa. Lallai sun yi ta yunkurin, sai ya zama Allah yana kame hannuwansu. Sai yanzu ne suka so biyan bukata, sai ya zama Allah bai tashi amsar rayuwar ba yanzu sai nan gaba.

ALMIZAN: Ganin wannan habin da aka yi maka, wanda ya jawo aka karya ka a cikin fafutikar da ake yi na neman ’yanto Shaikh Zakzaky daga halin da aka sa shi a ciki, ya kake ji a ranka?

SHAIKH KASIMU UMAR: Ni dai na farko wannan abin da ya same ni, ban taba farin ciki kamar wannan ranar ba. Waki’ar Gyallesu da aka yi ina ciki, amma cikin ikon Allah sai na fita ba ko kwarzane. Na dade raina yana min kuna. Kullum na tuno abin raina yana baci, ganin cewa ga wasu sun yi shahada, wasu sun yi raunuka, a kan kariya ga su Malam, amma ni ko kwarzane ban samu ba. Ya zan yi in hada ido da Malam in ya fito, alhali muna maganar cewa ba za a kai ga su Malam ba, sai an kai gare mu? Wannan sai nake kallon sa a matsayin takardata da na mika wajen Ubangiji, ita ce aka sanya wa hannu. Ina godiya ga Allah a kan wannan.

ALMIZAN: Bayan Muzaharar da aka yi ta kwanaki biyar a jere, sai ga shi gwamnati ta fito da Shaikh Zakzaky bainar jama’ar har ya yi hira da manema labarai, wasu suna ganin natijar wannan jajircewar ce, me Malam zai ce game da haka?

SHAIKH KASIMU UMAR: Tabbas za mu ce wannan natija ce ta Muzaharorin da aka yi na kwanaki biyar. Wannan ya kara masu matsin lamba, kuma duniya ta sake gano zaluncinsu a fili. Amma mu ba so muke su nuna mana Malam yana hira da ’yan jarida ba, kowa ya san Malam ba shi da lafiya, tunda inda suka kai Malam wajen hira da ’yan jarida (duk da bai ma san za a yi hira da shi ba) daga Asibiti suke, wanda ya je Asibiti kuwa, ko dai ya je duba marar lafiya, ko kuma shi bai da lafiya. To shi Malam ya fada bai da lafiya ne. Don haka ba muna so a ga Malam ba ne kawai, abin da muke cewa a sake shi ba bisa wani sharadi ba kamar yadda doka ta ce. Kuma in ba a sake shi ba za mu ci gaba. Daga nan inda nake gadon jinya, in yanzu Allah ya ban lafiya, Wallahi ba zan koma Sakkwato ba, Abuja za mu koma mu ci gaba da fafutika ga wannan al’amari, sai mun ga yadda Allah ya yi.

ALMIZAN: Ke nan idan ’yan uwa suka ci gaba da jajircewa haka za ta cimma ruwa?

SHAIKH KASIMU UMAR: Insha Allah. Tunda muna da hanyoyi daban-daban. Alhamdullahi ga wasu jama’a ne sun fara fitowa suna nuna rashin yardarsu. Ba mu san me zai sake faruwa ba nan gaba kadan. Muna fatan Allah ya sake farkar da zukatan wannan al’umma don su gane wannan zalunci bai takaita ga ’yan uwa Almajiran Shaikh Zakzaky kawai ba. Wannan Mutakabbirin yana son ya halaka al’umma ne gaba daya. Muna fatan Allah ya farkar da al’umma su gane haka.

ALMIZAN: Ya ka ji a ranka lokacin da ka ga Malam yana hira da ’yan jarida, musamman da yake wannan ne karon farko da ka gan shi a cikin shekaru biyu?

SHAIKH KASIMU UMAR: Alhamdullahi, tunda ba mu taba ganin Malam ba, ido da ido, duk da dai mun yi magana da shi a waya, amma ni na ji babu bambanci kafin a kama shi da kuma bayan an kama shi. Amma ganin da muka yi masa ya kara faranta mana rai da karfin gwiwa da kuma damuwa. Faranta mana rai, mun dade muna kallon Tafsir da Nahjul Balaga a Alwilaya, mun san maimaita mana ake yi, amma yanzu kai tsaye Malam ne muka gani sosai. Damuwarmu kuma ita ce; rashin lafiyar da muka gan shi da ita. Wanda duk ya ga Malam ya san yana bukatar ganin Likita da gaggawa. Kwarin gwiwa kuwa, ya sa za mu ci gaba da jajircewar da muke yi don ganin ya fito.

ALMIZAN: A karshe akwai sakon da kake da shi ga ’yan uwa?

SHAIKH KASIMU UMAR: Sakona ga ’yan uwa shi ne a jajirce. Gaskiya yanzu ’yan uwa sun farko, farkawar da duk wanda ke kallon abin da ke faruwa a duniya zai fahimci lallai Malam yana da zaratan mabiya, ga kuma ’ya’ya da jikoki sun taso suna cewa sai dai a kashe su kafin a kai ga iyaye ko kakanninsu. Kirana ga matasan nan kamar yadda aka jajirce a ranar Talata din nan a kara jajircewa fiye da haka. Su kuma iyaye su ci gaba da kara karfafa ’ya’yansu, su kuma rika fitowa tare da su. Su kuma ’yan uwa masu hannu da shuni a fitar da dukiya domin tallafa wa ’yan uwa ta hanyar abinci da zuwa a yi zaman dirshan ko kuma Muzaharori. Muna bukatar kowane dan uwa ya tashi ya yi abin da ya kamata ya yi. Muna fatan insha Allah wannan yunkuri da muka yi, kafin mu kai karshensa, Allah ya fito mana da su Malam.

ALMIZAN: Mun gode sosai. Allah ya kara sauki.

SHAIKH KASIMU UMAR: Ni ma na gode kwarai da gaske.